ఆరుద్ర దర్శనమ్

ఓం శ్రీ విఘ్నేశ్వరాయ నమః

సృష్టి స్థితి లయ కారణంబగు వేద మూర్తులు
బ్రహ్మ, విష్ణు, మహేశ్వరులే త్రిమూర్తులై
    మానవులకు పరమేశ్వర చింతనా తత్వమెరిగింప

    కలియుగ ఒడి మాయా వూయల వూగిసలనధిగమింప
వేద విజ్ఞాన గని నుండి భగవన్నామ సంకీర్తనచే
మాయా ప్రలోభంబుల లోను గాకుండుటకు

     శివ పురాణంబుద్భవించె భక్త జన రామణీయకంబై!
     ఒక నాడు బ్రహ్మ విష్ణులు కూడి యుండ
చండ ప్రచండ భాను మండల దేదీప్యకాంతి విరాజిల్లు
తుది మొదలు లేని అద్భుత ప్రకాశవంతమగు

    జ్యోతిస్స్వరూపంబుతో ఆరుద్ర దర్శనమను పేర
    విశ్వ దర్శనంబొసగె నా విశ్వేశ్వరుండు!
అగ్ని స్తంభంబగు నా జ్యోతి అరుణాచలంబై
పరబ్రహ్మంబు బిందు రూపమై
    ఆ పరమశివుడు లింగ రూపుడై భక్త సులభుండయ్యె!

ప్రణవ స్వరూపుడగు ఓంకారేశ్వరున్ గొలువ
పంచాక్షరీ మంత్రంబె ప్రామాణికంబయ్యె
    పంచముఖ స్వరూపుండగు ఆ పరమ శివుడు
    ఆదిమధ్యాంత రూపుడై ఆత్మ రూపంబులకు
తిరోదన, అనుగ్రహంబులనొనర్చి మానవాళికి
మోక్ష ప్రదాతయని శివపురాణ వైశిష్ట్యము తెలిపిరార్యులు.
   ఇది పరమ గురుడు చెప్పిన మాట తెలుసుకోరా పామరుడా!

పోలూరు బాబురావు, నూజివీడు