సత్యస్వరూపమ్

శ్రీరస్తు                                                ఓం                                            శుభమస్తు

శ్రీ విఘ్నేశ్వరాయ నమః

శ్రీ రాజరాజేశ్వరీదేవి నమః

ఓం శ్రీ మాత్త్రేనమః                               శ్రీ అపర్ణాయైనమః                         శ్రీ లలితాంబికాయైనమః

సత్యస్వరూపమ్

ప్రభవాది వత్సర నామక్రమణిలో
       శ్రీ వ్యయనామ సంవత్సరమున
ఆరు దశాబ్ది వత్సరముల క్రితము
       పశ్చిమాన కృష్ణానదీమతల్లి కనుసన్నల
సంస్కృతీసంపన్న సాహితీపురమగు
       గుంటూరులో పుణ్యదంపతులగు
పోలూరు వేంకట సుబ్బారావు, సరస్వతుల
       మేలు కలయికకు గుర్తుగ కార్తీక
శుధ్ధ పౌర్ణమి పర్వదినాన తృతీయ
       గర్భ తనయుడవై తొలి కుటుంబ
మగబిడ్డగా జన్మంబునొంది శుభమ్
       కరమగు 'స'కార నామధేయుడవై
కౌండిన్య గోత్ర పరంపరావిద్భావుడవై
       'త్రి'సకారముల కలగలుపు శోభతో
ఆ సత్యనారాయణుని నామకరణముతో
       దినదిన ప్రవర్ధమానవై శ్రీమన్నారాయణుని
కరుణా కటాక్ష వీక్షణములలో
       అలరారుచూ తల్లిదండ్రుల శిక్షణలో
విద్యాభ్యసనమొనర్చి కుటుంబములో
       తొట్టతొలి పట్టభధ్రుడవని పేర్గాంచితివి

అటుల అమ్మానాన్నల మోహాతిశయమున
       సప్తసోదరసోదరీమణులకు అమ్మనాన్నల
ప్రధమ అంత్యాక్షర కూర్పుతో కలిగిన
       పవిత్ర 'అన్న'యను పద సార్ధకతను
సత్యంబొనర్చి అన్నయను వరము పొంది
       అందరి ఆదారాభిమానాలు పొందినావు

చిన్ననాటి విద్యయంతయు నూజివీడులో
       గడుపు సమయాన గురువు జోస్యులవారి
శిష్యుడుగా పేరొంది, సన్యాసయ్య మాస్టారి
       శిక్షణలో 'షార్టుహాండు' చదువుతో
మిగుల మితభాషివై అల్పాక్షర సంభాషణతో
       అమిత భావ ప్రకటనము చేస్తూ
మనసునందున్న భావము వ్యక్తీరింపక
       పరుల హృదయాంతరంగంబు
గ్రహించు ప్రత్యేకత నీదు కాదే సుమా!

హిందూ కాలేజి విద్యానంతరము చిన్నచిన్న
       ఉద్యోగములు చేసి నిరంతర కృషితో
కెనరా బ్యాంకు ఉద్యోగము సంపాదించి
       యల్లాజోస్యుల వారి సకల సద్గుణ
సుగుణాలవాసి అందాల రాశియగు
       స్వరూపరాణిని వివాహమాడి మరల మరొక
'స'కారమును నీ జీవితంలోకి ఆహ్వానించి
       సకల శుభములకు ద్వారంబు తెరిచినావు!

అనతి కాలమునకే మీ స్నేహవృక్షము పరిమళ
      భరితమై 'మాధవీ'పుష్ప వికసనముకాగ
కడుపుచలువతో మలికాన్పులో
      'ప్రమీలా'విర్భవము కాగా, తదుపరి
సకల సద్గుణవంతుడు, విద్యాపారంగతుడగు
      'దిలీపు'డుద్భవింప, రంగాచార్యాశీర్వచన
ప్రభావముతో అతడు అమెరికా దేశాన స్థిరమొందెను
      

      ఈ జనవరి నెల 21వ తేదీన మీ దంపతులకు
షష్ఠిపూర్తి మహోత్సవము నెరపుట మీదు
      పూర్వజన్మ పుణ్యఫలము గాదె!
మీ అన్యోన్య దాంపత్యము పది కాలాల పాటు
      పచ్చగా, స్వఛ్ఛతగా  అభివృధ్ధినొందు గాక
యని ఆకాంక్షిస్తూ...

నీ సహోదరుడు పోలూరు బాబురావు

'స'కార నామధేయులు:-
సుబ్బారావు-సరస్వతి
సత్యనారయణరావు-స్వరూపరాణి

2006వ సంవత్సరములో మా అన్నగరి షష్ఠిపూర్తి ఉత్సవ సంధర్భమున వ్రాయబడినది